Bashkimi Demokratik për Integrim ka thirrur një protestë kombëtare në Tetovë për të kundërshtuar ndryshimin e emrave të disa rrugëve dhe sheshit, duke kërkuar rikthimin e emrave të vjetër. Sipas BDI-së, ky vendim i Gjykatës Kushtetuese bie në kundërshtim me rendin kushtetues dhe rrezikon zbatimin e Marrëveshjes së Ohrit, e cila ka garantuar paqen dhe stabilitetin ndëretnik në Maqedoninë e Veriut për më shumë se një çerek shekulli. Partia thekson se mungesa e reagimit institucional nga Komuna e Tetovës dhe Qeveria ka sjellë pasoja serioze dhe ka krijuar një precedent të rrezikshëm për sigurinë juridike në vend. Protesta e së shtunës synon të jetë një reagim qytetar paqësor dhe dinjitoz për të mbrojtur parimet kushtetuese dhe marrëveshjet që garantojnë bashkëjetesën dhe orientimin euroatlantik të vendit.