Në Tetovë, qytetarët po përballen me vështirësi në lëvizjen e lirë për shkak të uzurpimit të trotuareve nga bizneset dhe kafetë që vendosin tavolina, karrige, frigoriferë dhe materiale të tjera në hapësirat publike. Kjo situatë është veçanërisht problematike për personat me nevoja të veçanta dhe prindërit me karroca fëmijësh, ndërsa zona më e prekur është ajo nga rrethrrotullimi te Ëmbëltorja Taksi deri te Xhamia e Pashës. Komuna e Tetovës, përmes kryetarit Bilall Kasami dhe inspektoratit komunal, ka paralajmëruar se do të intensifikojë kontrollet dhe do të nisë një fushatë sensibilizuese për të larguar çdo pengesë në trotuare. Në raste të zaptimit pa leje, inspektorati mund të kërkojë largimin e pajisjeve dhe të shqiptojë sanksione ndaj bizneseve që tejkalojnë hapësirën e lejuar.