Trafiku në Prishtinë po përballet me vështirësi të mëdha për shkak të punimeve infrastrukturore, shtimit të numrit të automjeteve dhe moszbatimit të rregullave në fuqi. Kolonat e gjata dhe bllokimet e shpeshta janë prezente si në rrugët kryesore hyrëse, ashtu edhe në ato dytësore, duke shkaktuar shqetësime për qytetarët. Eksperti i komunikacionit Lavdim Hamiti sugjeron krijimin e parkingjeve në hyrje të qytetit dhe forcimin e transportit publik, duke përdorur korsitë e dedikuara për autobusë, ndërsa asamblisti Besart Krasniqi vlerëson se disa veprime të ndërmarra kanë rënduar situatën, si mbyllja e rrugëve pa alternativa të mjaftueshme. Drejtori i Transformimit Gëzim Kastrati thekson se ndërtimi i unazës së kryeqytetit do të ulte ngarkesën e trafikut deri në 30-40%, ndërsa statistikat tregojnë se në Prishtinë hyjnë çdo ditë rreth 140 mijë automjete nga komunat e tjera, duke e rënduar më tej situatën në trafik.