Nga data 24 gusht, banorët e fshatrave të Strugës mund të mbeten pa transport publik pasi 15 transportues kanë paralajmëruar ndërprerjen e shërbimit. Ata kërkojnë pagesën e borxhit disavjeçar nga Komuna e Strugës për transportin e nxënësve dhe rritjen e çmimit të biletave, i cili nuk është ndryshuar që nga viti 2022. Transportuesit theksojnë se shpenzimet për karburant, pjesë rezervë dhe mirëmbajtje janë rritur ndjeshëm, duke e bërë të pamundur vazhdimin e punës në kushtet aktuale. Kryetari i komunës, Mendi Qyra, pranon borxhin e akumuluar nga pushteti i mëparshëm dhe paralajmëron rritje të çmimeve në seancën e ardhshme të Këshillit Komunal, ndërsa thekson se pagesat do të kryhen gradualisht brenda disa muajve.