Orce Gjorgjievski ka sqaruar se uji në Shkup është mikrobiologjikisht dhe kimikisht i sigurt për konsum, duke theksuar se analizat ditore tregojnë rezultate të rregullta dhe të besueshme. Ai ka hedhur poshtë frikën dhe panikun e krijuar nga informacionet për një deponi që ndodhet rreth 30 kilometra larg burimit kryesor të ujit "Rashçe", jashtë territorit të Bashkisë së Shkupit. Gjorgjievski ka njoftuar se burimi "Rashçe" është nën mbikëqyrje të vazhdueshme 24-orëshe me kamera dhe siguri fizike, ndërsa NP "Ujësjellës dhe Kanalizime" po merr masa për pastrimin e çdo deponie që mund të paraqesë problem mjedisor. Ai ka bërë thirrje për qetësi dhe besim te faktet dhe analizat, duke theksuar se nuk do të tolerojë përhapjen e panikut apo manipulimeve që dëmtojnë besimin e qytetarëve.