Pas një periudhe prej gati një muaji, qytetarët e Gostivarit mund të përdorin sërish ujin nga ujësjellësi për pije. Shtabi Kryesor për Menaxhimin e Krizave njoftoi se rezultatet më të fundit të analizave mikrobiologjike dhe bakteriologjike treguan se uji është i rregullt dhe i sigurt për konsum. Drejtori i Agjencisë për Ushqim dhe Veterinari konfirmoi sigurinë e ujit, ndërsa autoritetet rekomandojnë që para përdorimit, uji të lirohet mirë nga çezmat. Ky vendim u mor pas shqyrtimit të të dhënave më të fundit në mbledhjen e Shtabit Kryesor, duke rikthyer besimin tek furnizimi me ujë të pijshëm në Gostivar.