Sipas listës "Global 2000" të publikuar nga Qendra për Renditjen e Universiteteve Botërore, asnjë universitet nga Maqedonia e Veriut nuk figuron në mesin e 2000 universiteteve më të mira në botë. Në rajon, universitetet më të larta në renditje janë Universiteti i Beogradit në vendin e 393-të, Universiteti i Lubjanës në vendin e 444-të dhe Universiteti i Zagrebit në vendin e 522-të. Lista vlerëson universitetet në bazë të cilësisë së arsimit, punësimit të të diplomuarve, cilësisë së stafit mësimdhënës dhe punës kërkimore, pa u mbështetur në anketa apo të dhëna të ofruara nga vetë institucionet. Universitetet më të mira në botë këtë vit janë Harvard, MIT dhe Stanford, ndërsa universitetet nga Kroacia dhe Sllovenia gjithashtu janë përfaqësuar në listë me disa institucione.