Ura e Gjakut në Mitrovicë, që lidh lagjen “Vaganicë” me Stacionin e Autobusëve, është në gjendje shumë të keqe infrastrukturore dhe paraqet rrezik serioz për qytetarët, veçanërisht për fëmijët. Banorët kanë shprehur shqetësime të mëdha, duke theksuar se ura është lënë pas dore prej vitesh dhe se situata është alarmante, madje disa thonë se ura është në gjendje të tillë që çdo moment mund të shembet. Komuna e Mitrovicës ka deklaruar se nuk ka kompetenca për këtë urë, pasi përgjegjësia i takon Ministrisë së Infrastrukturës, por ka premtuar se do të riadresojë çështjen për ndërhyrje të shpejtë. Banorët kërkojnë ndërhyrje urgjente për të parandaluar aksidente dhe për të siguruar kalimin e sigurt të qytetarëve.