Punimet për ndërtimin e urës së tretë mbi lumin Ibër në Mitrovicë po ecin sipas planit dhe pritet të përfundojnë deri në fund të vitit 2026. Ura do të ketë katër korsi me gjerësi 22.5 metra, trotuare në të dy anët, si dhe do të shoqërohet me ndërtimin e dy rrethrrotullimeve dhe një segmenti rrugor me gjatësi 500 metra. Projekti përfshin gjithashtu rehabilitimin e shtratit të lumit Ibër dhe ndriçimin modern për të rritur sigurinë dhe mbrojtjen e mjedisit. Ministri në detyrë i Infrastrukturës, Dimal Basha, theksoi se kjo është ura e tretë e ndërtuar gjatë qeverisjes Kurti dhe do të përmirësojë qasjen dhe sigurinë për organet e rendit, qytetarët dhe bizneset në të dy anët e lumit.