Një ish-oficer i Forcave Ajrore Italiane, Nunzio Santucci, është njohur zyrtarisht si “Viktimë e Detyrës” nga gjykata italiane, pasi u vërtetua se kanceri i stomakut nga i cili vuante lidhej me shërbimin e tij gjatë misionit paqeruajtës në Gjakovë, Kosovë. Gjykata e Velletrit ka konstatuar se ambienti ku ai shërbeu ishte i kontaminuar me azbest, nanopjesëza metalesh të rënda dhe mbetje municionesh me uranium të varfëruar, duke shkaktuar sëmundjen e rëndë që ndryshoi jetën e tij. Santucci do të përfitojë një dëmshpërblim prej rreth 300 mijë eurosh, përfshirë pagesa të prapambetura dhe pension të përjetshëm, si dhe do të përfshihet në listën kombëtare të Viktimave të Detyrës në Itali. Ky vendim juridik krijon një precedent të rëndësishëm, duke lehtësuar provat e nevojshme për ushtarët që kanë shërbyer në zona me rrezik të lartë dhe kërkojnë drejtësi për sëmundjet e lidhura me detyrën.