Koalicioni politik “VLEN” organizon sot në Shkup një kongres të rëndësishëm për të bashkuar pesë subjektet e tij në një parti të vetme politike. Mbi 805 delegatë do të marrin pjesë në këtë ngjarje që pritet të konfirmojë këtë proces, i cili është pjesë e shumicës qeverisëse. Kongresi do të fillojë në orën 17:00 në Filharmoninë e Maqedonisë dhe do të përfshijë fjalime solemne nga nikoqirët dhe mysafirët, si dhe deklarata nga liderët e koalicionit. Përfaqësuesi i VLEN-it, Driton Sulejmani, theksoi se ky bashkim është një akt përgjegjësie ndaj qytetarëve dhe një dëshmi e vendosmërisë për të vendosur interesin e përbashkët mbi prioritetet partiake, duke u fokusuar në barazinë reale të shqiptarëve, shtetin juridik dhe luftën kundër korrupsionit.