Pas shumë vitesh, Vlora ka vendosur të rikthejë semaforët në disa nga nyjet më problematike të trafikut në qytet. Kjo masë synon të lehtësojë qarkullimin dhe të shmangë bllokimet e automjeteve gjatë sezonit turistik, kur fluksi i makinave është më i lartë. Semaforët do të testohen fillimisht në rrugën Transballkanike, rrethin e Skelës dhe rrugën e Spitalit, zona që prej kohësh kanë pasur vështirësi në lëvizje. Nëse kjo fazë prove rezulton e suksesshme, autoritetet planifikojnë të zgjerojnë projektin edhe në akse të tjera kryesore të qytetit.