Gjatë një takimi me qytetarët në qytetin e Borit, presidenti serb Aleksandar Vuçiç u përfshi në një skenë të rëndë emocionale kur një grua, Gordana Kariq, u detyrua të tregonte para fëmijës së saj të sëmurë se nuk ishte nëna biologjike e tij. Gruaja kishte kërkuar ndihmë për problemet me marrjen e ndihmës sociale për fëmijën, i cili ka pasur disa operacione dhe vuante nga probleme me zemrën, por nuk kishte marrë asnjë pagesë për nëntë muaj. Në vend që të përgjigjej drejtpërdrejt për ndihmën sociale, Vuçiç insistoi që ajo të tregonte të gjithë situatën, duke e nxitur të zbulonte sekretin familjar në prani të fëmijës, pavarësisht dëshirës së saj për ta shmangur këtë. Pas rrëfimit emocional të gruas, presidenti premtoi se do të përpiqej të zgjidhte çështjen dhe do t’i jepte një përgjigje deri të mërkurën, duke theksuar se ajo mbetet nëna e fëmijës për shkak të kujdesit që i ka dhënë gjatë 13 viteve.