Presidenti i Serbisë, Aleksandar Vuçiq, gjatë ceremonisë përkujtimore të viktimave serbe të operacionit kroat “Oluja” në Mrkonjiq Grad, përdori një retorikë nacionaliste që rikthen narrativat e viteve ’90 të ish-presidentit Millosheviq. Ai paraqiti Serbinë si viktimë, mohoi përgjegjësinë për shpërbërjen e ish-Jugosllavisë dhe akuzoi Kroacinë dhe Perëndimin, përfshirë SHBA-në dhe vendet evropiane, për mbështetjen e operacionit ushtarak kroat. Në të njëjtin tubim, lideri i Republika Srpskas, Millorad Dodik, e cilësoi “Olujën” si agresion dhe gjenocid, duke sfiduar edhe rolin e Bashkimit Evropian dhe duke vënë në dyshim funksionimin e Bosnjës dhe Hercegovinës si shtet multietnik. Ndërsa patriarku i Kishës Ortodokse Serbe bëri thirrje për tejkalimin e ndarjeve dhe shmangien e përçarjeve, retorika e Vuçiqit dhe Dodikut theksoi tensionet e vazhdueshme në rajon dhe sfidat për pajtimin historik.