Presidenti i Serbisë, Aleksandar Vuçiq, ka konfirmuar pjesëmarrjen e tij në samitin e Bashkimit Evropian dhe vendeve të Ballkanit Perëndimor në Mal të Zi, pavarësisht paralajmërimeve për rreziqe sigurie nga shërbimi serb i inteligjencës. Ai është informuar për kërcënimet nga agjencitë e sigurisë, të cilat e këshilluan të mos udhëtojë për shkak të veprimeve armiqësore të shërbimeve të huaja dhe klaneve kriminale në Mal të Zi. Një ditë para samitit, autoritetet malazeze dëbuan 87 shtetas serbë, të cilët u konsideruan si “rrezik për sigurinë” dhe u përshkruan si pjesë e sigurimit joformal të Vuçiqit. Në këtë sfond tensioni, Vuçiq ka theksuar se do të flasë për çështje të tjera në Mal të Zi dhe ka bërë shaka me presidentin e Këshillit Evropian duke thënë se do të takohen “nëse nuk paraqet kërcënim hibrid”.