Platforma “Liria ka emër” ka njoftuar se sonte do të zhvillohet aktiviteti “Zjarri i Lirisë” në Zonën Operative të Pashtrikut, duke filluar nga ora 19:00 te Varrezat e Dëshmorëve në Landovicë. Ky event është pjesë e iniciativës “7 Zona, 7 Zjarre, Një Luftë, Një Kujtesë, Drejtësi”, që synon të nderojë sakrificën e dëshmorëve të Ushtrisë Çlirimtare të Kosovës dhe të ruajë kujtesën historike të luftës. Pas ndezjes së zjarreve në Likoc, Gllogjan dhe Zonën Operative të Llapit, aktiviteti vazhdon në Pashtrik dhe do të shtrihet edhe në zona të tjera të Kosovës. Vendndodhja e zgjedhur ka një simbolikë të veçantë për luftën çlirimtare, duke theksuar rëndësinë e kujtesës dhe drejtësisë për të rënët në luftë.