Një vatër zjarri u aktivizua paraditen e së hënës në zonën e Matomarës, në Bashkinë Finiq, duke shkaktuar përhapje të shpejtë të flakëve drejt Mesopotamit dhe rrezik për fshatin Vllahat në Delvinë. Për shkak të erës së fortë dhe terrenit të vështirë, ndërhyrja nga toka është e vështirë, ndaj autoritetet kërkuan ndërhyrje nga ajri për të frenuar avancimin e zjarrit dhe për të mbrojtur zonat e banuara. Në terren janë angazhuar forcat zjarrfikëse nga Finiqi, Delvina, Saranda dhe Konispoli, si dhe rreth 50 vullnetarë dhe 40 forca të Forcave të Armatosura, që po përdorin tre helikopterë për ndërhyrje ajrore. Operacionet vijojnë intensivisht për izolimin dhe shuarjen e flakëve, ndërsa strukturat operacionale janë në gatishmëri për të parandaluar përhapjen e mëtejshme të zjarrit.