Zvicra ka vendosur të vazhdojë pjesëmarrjen e saj në misionin paqeruajtës të NATO-s në Kosovë (KFOR) deri në fund të vitit 2029, duke rritur numrin maksimal të ushtarëve zviceranë në 300. Këshilli Kombëtar zviceran miratoi me shumicë votash këtë vendim, duke lejuar gjithashtu rritje të përkohshme të kontingjentit në rast nevoje, për të përballuar sfidat e sigurisë apo kërkesat operacionale. Vendimi u mor duke marrë parasysh ndryshimet e vazhdueshme në kontekstin evropian dhe nevojën për reagim të shpejtë në Ballkanin Perëndimor. Autoritetet theksuan se situata në Kosovë, veçanërisht në veri, mbetet e ndjeshme dhe e paqëndrueshme, duke justifikuar kështu forcimin e misionit ndërkombëtar të paqes në rajon.