Këngëtarja shqiptaro-amerikane Bebe Rexha ka ndarë me ndjekësit një moment shumë të vështirë të karrierës së saj, duke publikuar një video ku shfaqet duke qarë dhe me sy të nxirë, në ditën kur ish-shtëpia e saj diskografike Warner Music e shkëputi pas 12 vitesh bashkëpunim. Ajo rrëfen se periudha e fundit shtatëvjeçare ka qenë një betejë e vështirë, gjatë së cilës vuante në heshtje, duke theksuar frikën dhe pasigurinë që përjetoi kur u bë artiste e pavarur. Sot, Bebe Rexha feston suksesin e këngës së saj “New Religion”, e cila është renditur në vendin e parë në Billboard Dance/Airplay dhe US Dance Radio, duke e konsideruar këtë fitore si një rilindje artistike dhe personale. Në postimin e saj, ajo falenderon ekipin që e mbështet dhe dërgon një mesazh të fuqishëm për ata që nuk besuan në të gjatë rrugëtimit, duke treguar se tani ndihet e lirë dhe e rrethuar nga njerëz që e ngrejnë lart.