Pak ditë para fillimit të Festivalit të 70-të të Eurovisionit në Vjenë, Unioni Evropian i Transmetimeve (EBU) ka paralajmëruar transmetuesin izraelit KAN për shkelje të rregullave të garës. Shkak u bë një video promovuese ku përfaqësuesi izraelit Noam Bettan i kërkonte shikuesve në 13 gjuhë që të votonin 10 herë për Izraelin, një thirrje që bie ndesh me rregullat dhe frymën e garës. EBU reagoi shpejt, duke kërkuar ndalimin dhe heqjen e videove nga platformat, kërkesë që u respektua menjëherë nga delegacioni izraelit. Megjithatë, EBU paralajmëroi se do të marrë masa nëse praktika përsëritet, ndërsa fansat rikujtuan edhe shqetësimet e mëparshme për politizim dhe keqpërdorime të mundshme nga transmetuesi izraelit.