Këngëtarja Dafina Dauti ka publikuar këngën e saj të re “Kosova po pret”, një projekt emocional që i dedikohet ish-krerëve të Ushtrisë Çlirimtare të Kosovës që po përballen me procesin gjyqësor në Hagë. Teksti i këngës është shkruar nga Bediha Emini dhe shpreh pritjen, mallin dhe shpresën e familjarëve dhe qytetarëve për kthimin e tyre në vend. Ky projekt muzikor vjen vetëm dhjetë ditë para shpalljes së aktgjykimit të shkallës së parë ndaj Hashim Thaçit, Kadri Veselit, Jakup Krasniqit dhe Rexhep Selimit, të cilët ndodhen në Hagë që nga nëntori i vitit 2020 dhe janë deklaruar të pafajshëm. Seanca e vendimit do të jetë publike dhe do të transmetohet edhe në gjuhën shqipe. Në prag të këtij momenti të rëndësishëm, më 12 shtator në Prishtinë do të mbahet edhe marshi “Kosova po pret”, i organizuar nga platforma “Liria ka Emër”, që synon të shprehë mbështetjen për krerët e UÇK-së. Kënga e Dafina Dautit shërben si një thirrje për bashkim dhe shpresë në një periudhë të tensionuar për vendin.