Në kuadër të koncertit të Kanye West që mbahet sot në Kashar të Tiranës, Drejtoria Vendore e Policisë ka njoftuar për kufizime të mëdha në qarkullimin rrugor. Nga ora 07:00 deri në 24:00 do të ndalohet qarkullimi në aksin dytësor të autostradës “Durrës–Tiranë” nga “Eiffeli” deri te “Casa Italia”, ku segmenti do të funksionojë vetëm me sens daljeje. Po ashtu, do të ketë ndalime në korsinë e daljes në rrethrrotullimin e “Casa Italia-s” dhe në rrugët përreth si “Pavarësia”, “Sokrat Miho”, “Kasem Shima” dhe “7 Nëntori”, me disa segmente që do të jenë vetëm me sens daljeje. Policia paralajmëron se gjatë ditës mund të ketë bllokime të pjesshme në urën e Institutit deri tek “Casa Italia”, në varësi të fluksit të pjesëmarrësve, ndërsa akses në zonat e bllokuara do të kenë vetëm mjetet e emergjencës dhe policia për të garantuar zhvillimin normal të koncertit.