Reperi amerikan Lil Wayne do të marrë një yll në Hollywood Walk of Fame gjatë vitit 2027, një nga nderimet më prestigjioze në industrinë e muzikës dhe argëtimit. Lajmi e surprizoi artistin, i cili fillimisht mendoi se ishte shaka kur vëllai i tij i tha për këtë nderim. Lil Wayne ka një karrierë mbi dy dekada me miliona albume të shitura dhe hite që kanë dominuar klasifikimet muzikore, duke u bërë një nga figurat më me ndikim në hip-hopin amerikan. Ceremonia e vendosjes së yllit do të zhvillohet në Hollywood, ku ai do t’i bashkohet emrave të njohur të muzikës dhe kinemasë që janë përjetësuar në këtë simbol të industrisë.