AC Milan Junior Camp Prishtina ka hapur zyrtarisht edicionin e tij të dytë, i cili do të zhvillohet nga 22 deri më 26 qershor 2026 në Kompleksin Sportiv në Bermicë. Ceremonia e hapjes u mbajt në Sheshin “Zahir Pajaziti” gjatë Prishtina Football Fest, duke krijuar një atmosferë sportive unike në kryeqytet, ku po transmetohen edhe ndeshjet e FIFA World Cup 2026. Pas suksesit të edicionit të parë dhe mundësisë që pjesëmarrësit patën për të përjetuar Milan Experience në Milano, kampi synon të ofrojë edhe më shumë mundësi zhvillimi për fëmijët sipas metodologjisë së AC Milan Academy. Gjatë pesë ditëve, qindra fëmijë do të stërviten nën drejtimin e trajnerëve zyrtarë, duke përfituar njohuri teknike, taktike dhe edukative, ndërsa aktivitetet do të përmbyllen me ceremoninë e ndarjes së certifikatave për pjesëmarrësit.