Kryetari i Federatës së Futbollit të Kosovës, Agim Ademi, së bashku me përfaqësues të tjerë të federatës, zhvilluan një takim me ministrin e ri të Sportit, Blerim Gashani. Në këtë takim u vlerësua puna dhe sukseset e arritura nga FFK-ja, ndërsa u theksua rëndësia e bashkëpunimit të vazhdueshëm institucional për zhvillimin e futbollit në vend. Një nga temat kryesore ishte infrastruktura sportive, ku u diskutua për nevojën e ndërtimit dhe përfundimit të stadiumeve, të cilat janë prioritet i ministrisë dhe për të cilat nuk do të tolerohen vonesa të pajustifikuara. Gjithashtu, u trajtua edhe organizimi i ndeshjeve të Kombëtares së Kosovës në kuadër të "play-off"-it për Kupën e Botës 2026 dhe rëndësia e mbështetjes institucionale për këto evente.