Alban Dragusha është zyrtarizuar si trajner i ri i FC Prishtinës, duke marrë drejtimin e skuadrës pas largimit të Afrim Tovërlanit. Dragusha, 44 vjeç, vjen në krye të bardhekaltërve pas një periudhe të suksesshme te KF Ramiz Sadiku, ku e ka drejtuar që nga korriku i vitit 2023 dhe e ka shndërruar në një nga surprizat më të këndshme të Ligës së Parë këtë sezon. Ai ka një karrierë të pasur si trajner dhe futbollist, duke luajtur dhe punuar në Kosovë, Ukrainë, Azerbajxhan, Suedi dhe Shqipëri. Prishtina aktualisht ndodhet në vendin e tretë në tabelë me 38 pikë dhe është në një seri prej pesë ndeshjesh pa fitore, ndërsa Dragusha do të debutojë në ndeshjen kundër Ballkanit në stadiumin “Fadil Vokrri”.