Trajneri i Brazilit, Carlo Ancelotti, ka bërë një krahasim të veçantë mes pritshmërive të “Seleçaos” dhe periudhës së tij te Real Madridi, duke theksuar se dëshira për të fituar Kupën e Botës është po aq e madhe sa obsesioni i klubit spanjoll për “La Deciman”, trofeun e dhjetë të Ligës së Kampionëve. Brazili nuk ka fituar Botërorin që nga viti 2002 dhe kërkon të sigurojë trofeun e gjashtë në histori, të njohur si “O Hexa”. Për këtë arsye, Federata Braziliane vendosi të besojë drejtimin e skuadrës te Ancelotti, një nga trajnerët më të suksesshëm në historinë e futbollit. Ai do të nisë aventurën në Botërorin 2026 me synimin për t’i dhënë fund pritjes 24-vjeçare dhe për ta rikthyer Brazilin në majën e futbollit botëror.