Sulmuesi i Kombëtares shqiptare, Arbër Hoxha, është në prag të largimit nga Dinamo Zagrebi për t’u transferuar te klubi polak Widzew Lodz. Ky transferim pritet të kushtojë rreth 5 milionë euro dhe do të realizohet nëse Widzew Lodz mbetet në elitën e futbollit polak, pasi aktualisht klubi ndodhet në vendin e parafundit dhe rrezikon rënien nga liga. Hoxha shënoi golin e vetëm të Shqipërisë në ndeshjen e “play-off”-it për Botërorin 2026 kundër Polonisë, një gol që megjithëse nuk i solli fitoren ekipit, duket se ka rritur interesin për të në tregun e transferimeve. Widzew Lodz ka treguar besim të madh te futbollistët shqiptarë, duke pasur në skuadër edhe Juljan Shehun, Lindon Selahin dhe Andi Zeqirin, ndërsa klubi zotëron edhe kartonin e mbrojtësit të Kosovës, Dion Gallapeni.