Portieri i Kombëtares së Kosovës, Arijanet Muriq, po vazhdon me paraqitje të shkëlqyera te skuadra italiane Sassuolo në Serie A, duke u përfshirë në 11-shen e xhiros së 27-të pas një ndeshjeje ku realizoi gjashtë pritje dhe mori notën 9.5 nga “SofaScore”. Muriq është huazuar te Sassuolo nga Ipswich Towni anglez dhe klubi italian ka opsionin për ta blerë atë në verë për 8 milionë euro. Drejtori ekzekutiv i Sassuolos, Giovanni Carnevali, e ka vlerësuar lart portierin kosovar, duke e cilësuar si një nga lojtarët më premtues dhe duke lënë të hapur mundësinë e negociatave për uljen e çmimit të blerjes së kartonit të tij. Muriq, 27 vjeç, ka kontratë me Ipswich Town deri në vitin 2028 dhe me Sassuolon ka regjistruar 26 paraqitje në këtë sezon, duke tërhequr edhe interesimin e klubeve të mëdha si Juventusi.