Presidenti i Federatës Shqiptare të Futbollit, Armand Duka, ka shprehur mbështetjen e tij për Kombëtaren e Kosovës para ndeshjes finale të plejofit kualifikues për Kupën e Botës 2026 kundër Turqisë, që zhvillohet sonte në stadiumin “Fadil Vokrri” në Prishtinë. Në një mesazh emocional në rrjetet sociale, Duka theksoi lidhjen e fortë mes dy kombëtareve shqiptare, duke shkruar: “Ndoshta sot mund të ishim dy... por edhe kështu, jemi një. Me krenarinë që na dha Shqipëria dhe shpresën që na jep Kosova. Forca djemtë tanë!”. Ky reagim simbolik vjen në një moment të rëndësishëm për Kosovën, e cila synon një rezultat historik dhe kualifikimin për herë të parë në Botëror. Mesazhi i Dukës është pritur shumë pozitivisht nga tifozët, duke forcuar ndjenjën e unitetit dhe mbështetjes për “Dardanët” në këtë sfidë vendimtare.