Faza finale “Final 4” e kampionatit nis këtë të shtunë në stadiumin “Air Albania” me ndeshjen mes Vllaznisë dhe Dinamo City, që do të luhet në orën 19:00. Vllaznia, e vendosur në krye të renditjes me 31 pikë, pret të përfitojë nga mbështetja masive e tifozërisë shkodrane, e cila pritet të jetë një nga forcat kryesore të skuadrës në këtë duel vendimtar. Atmosfera në tribunat e stadiumit pritet të jetë elektrizuese, me tifozët kuqeblu që kanë nisur mobilizimin për të mbështetur ekipin dhe për të krijuar një ambient motivues dhe entuziast. Ndërkohë, Dinamo City, që ndodhet në vendin e katërt me 24 pikë, kërkon të nisë me një rezultat pozitiv rrugëtimin në fazën finale, duke premtuar një sfidë të fortë dhe emocionuese për tifozët e të dyja skuadrave.