Ndeshja e fundit e stinorit të rregullt të Superligës së Kosovës në basketboll u zhvillua mes Bashkimit dhe Borës, ku prizrenasit fituan me rezultat 96:70. Bashkimi dominoi gjatë gjithë ndeshjes duke fituar të gjitha çerekët dhe u mbështet në paraqitjen e shkëlqyer të Jalen Riley, i cili shënoi 22 pikë, mori pesë kërcime dhe dha pesë asistime. Nga ana tjetër, te Bora u dallua Shaquan Jules me 19 pikë dhe shtatë kërcime. Pas kësaj fitoreje, Bashkimi përfundon në vendin e dytë me 48 pikë dhe do të nisë plejofin nga gjysmëfinalja, ndërsa Bora, e treta me 42 pikë, do të luajë në çerekfinale kundër Prishtinës. Plejofi nis këtë vikend me përballjet Golden Eagle Ylli – Peja dhe Bora – Prishtina.