Klubi i basketbollit Bashkimi nga Prizreni ka vazhduar dominimin në Superligën e Kosovës në konkurrencën e femrave, duke fituar titullin e kampionit për herë të katërt radhazi dhe të dhjetin në total. Në ndeshjen vendimtare të zhvilluar në palestrën “Karagaçi” në Pejë, Bashkimi mposhti skuadrën vendas, Peja 03, me rezultatin 71:61, duke fituar serinë finale 4:3. Mysafiret nga Prizreni dominuan dy çerekët e parë, duke krijuar një epërsi të thellë 42:24, ndërsa Peja 03 tentoi rikthimin në pjesën e dytë, por nuk arriti të përmbysë rezultatin. Alexis Marie Mead ishte më e dalluara te Bashkimi me 26 pikë, tetë asistime dhe katër kërcime, ndërsa te Peja 03 spikati Paige Powell me 21 pikë dhe dhjetë kërcime. Përveç titullit të kampionit, Bashkimi këtë sezon ka fituar edhe Kupën e Kosovës dhe Ligën Unike, duke konfirmuar kështu dominimin e tyre në basketbollin femëror kosovar.