Xhiroja e fundit e stinorit të rregullt në Superligën e Kosovës në basketboll nis të mërkurën dhe do të përcaktojë skuadrat që do të bien nga kategoria. Në garë për të shmangur rënien janë Prishtina me 37 pikë në vendin e gjashtë, si dhe Vëllaznimi dhe Rahoveci 029 me nga 36 pikë, që ndodhen në dy pozitat e fundit në tabelë. Vendi i gjashtë siguron pjesëmarrjen në play-off, i shtatë garanton mbetjen në Superligë, ndërsa i teti bie në kategorinë e dytë. Ndeshjet vendimtare zhvillohen të mërkurën, me Prishtinën që luan në Mitrovicë ndaj Trepçës, Vëllaznimin që pret Pejën dhe Rahovecin që përballet në udhëtim me Golden Eagle Yllin, ndërsa të enjten luhet dueli Bashkimi – Bora në Prizren. Këto përballje do të përcaktojnë fatin e skuadrave në fund të stinorit para nisjes së play-offit.