Alessandro Bastoni duket gjithnjë e më i vendosur të vazhdojë karrierën te Interi, duke zbehur spekulimet për një transferim te Barcelona. Pas një sezoni të suksesshëm ku fitoi titullin e Serie A-së dhe Kupën Italiane, mbrojtësi italian nuk ka kërkuar largimin dhe konsideron Interin prioritetin kryesor për të ardhmen e tij. Nga ana tjetër, marrëveshja mes Interit dhe Barcelonës ngec për shkak të çmimit të lartë prej 70 milionë eurosh që kërkon Interi, një shumë që katalanasit e shohin të vështirë për t’u përballuar, pasi fokusi i tyre është gjetja e një pasardhësi për Robert Lewandowskin. Kontrata e Bastonit me Interin është e vlefshme deri në vitin 2028, dhe klubi beson se ai do të mbetet një nga shtyllat kryesore të mbrojtjes edhe në sezonet e ardhshme.