Baton Zabërgja, sulmuesi kosovar i Metalist Kharkiv, ka vazhduar me paraqitjet e tij të mira në Premier Leaguen e Ukrainës duke shënuar një gol dhe dhënë një asistim në fitoren e thellë 5:0 ndaj Obolonit. Ai asistoi te goli i dytë të shënuar nga Carlos Paraco në minutën e tetë, ndërsa shtatë minuta më pas shënoi vetë për rezultatin 3:0. Me këtë performancë, 25-vjeçari nga Vushtrria ka arritur të kontribuojë me katër gola dhe tri asistime në këtë edicion në të gjitha garat. Zabërgja luajti deri në minutën e 59-të, duke ndikuar ndjeshëm në suksesin e skuadrës së tij në xhiron e pestë të kampionatit.