Drejtori sportiv i Bayernit, Max Eberl, ka bërë të qartë se Michael Olise do të mbetet pjesë e projektit afatgjatë të klubit dhe nuk është në planet e largimit, pavarësisht interesimit të klubeve të mëdha evropiane si Real Madrid. Olise, i transferuar nga Crystal Palace, është kthyer në një nga lojtarët kyç të skuadrës dhe konsiderohet një nga shtyllat e së ardhmes së Bayernit. Presidenti Herbert Hainer ka theksuar se Bayern nuk është një “klub shitës” dhe mbështet plotësisht qëndrimin për të mbajtur francezin. Ndërkohë, drejtuesit kanë konfirmuar se ekipi është i kompletuar për sezonin e ardhshëm, por tre futbollistë – Sacha Boey, Joao Palhinha dhe Bryan Zaragoza – janë njoftuar që duhet të gjejnë klube të reja dhe pritet largimi i tyre.