Klubi i futbollit Besa e Pejës ka reaguar ashpër pas humbjes 3-2 në Ferizaj ndaj Dinamos, duke akuzuar ndërhyrje të rënda ndaj lojtarëve të tyre dhe vendime të diskutueshme të gjyqtarëve që ndikuan në rrjedhën e ndeshjes. Sipas klubit, loja ishte e barabartë deri në momentin kur Besa arriti epërsinë në rezultat, por më pas situata ndryshoi për keq, me ndërhyrje të papranueshme dhe presion të vazhdueshëm ndaj gjyqtarit nga ana e kundërshtarëve. Për shkak të lëndimeve të shkaktuara, skuadra pejane u detyrua të bëjë zëvendësime, ndërsa rastet nuk u ndëshkuan siç duhet, duke cenuar drejtësinë dhe barazinë në garë. Besa kërkon trajtim serioz nga institucionet përkatëse dhe paralajmëron dorëzimin e video-incizimeve të ndeshjes për shqyrtim të mëtejshëm, duke theksuar se synimi i tyre mbetet futbolli i pastër dhe respekti për lojën.