Juventusi po përgatitet për ndryshime të mëdha në skuadër gjatë verës, dhe një prej lojtarëve që pritet të largohet është Edon Zhegrova. Nën drejtimin e trajnerit Luciano Spalletti, i cili sapo ka rinovuar kontratën, Zhegrova nuk po gjen hapësirë në ekip dhe pritet të largohet pasi nuk bën pjesë në planet e trajnerit italian. Sipas mediave turke, klubi Besiktasi ka shfaqur interes për përfaqësuesin e Kosovës dhe ka kontaktuar menaxherin e tij për të marrë informacion mbi situatën kontraktuale. Zhegrova, i cili ka kontratë me Juventusin deri në vitin 2030 dhe është transferuar për 15 milionë euro, ka luajtur shumë pak këtë sezon, vetëm 447 minuta në të gjitha garat, pa shënuar gola apo asistime, dhe duket se po planifikon largimin në fund të sezonit.