Tifozët shqiptarë tashmë kanë mundësinë të blejnë online biletat për ndeshjen e Kombëtares kuqezi ndaj Finlandës, që do të zhvillohet më 3 tetor 2026 në “The Olympic Stadium” të Helsinkit. Biletat janë të rezervuara në një sektor të veçantë për tifozerinë mike dhe mund të blihen vetëm përmes një linku të posaçëm “Away Fans” ku duhet të regjistrohen dhe të zgjedhin vendet e preferuara. Pagesa kryhet online përmes platformës, duke siguruar një proces të thjeshtë dhe të shpejtë për tifozët. Federata Shqiptare e Futbollit fton të gjithë mbështetësit që të jenë pjesë e kësaj sfide të rëndësishme në UEFA Nations League dhe të mbështesin Kombëtaren në transfertë.