Skuadra norvegjeze Bodo/Glimt shkaktoi një befasi të madhe duke mposhtur Interin 3:1 në ndeshjen e parë të play-off-it të Champions League, që u zhvillua në Bodo. Golat për vendasit u shënuan nga Sondre Brunstad Fet në minutën e 20-të, Jens Petter Hauge në të 61-ën dhe Kasper Hogh në të 64-ën, ndërsa për Interin shënoi Pio Esposito në minutën e 30-të. Kjo humbje e rëndë ka vënë në presion trajnerin Chivu dhe skuadrën italiane, e cila duhet të përmbysë rezultatin në ndeshjen e kthimit në “San Siro” më 24 shkurt. Bodo/Glimt ka treguar formë të shkëlqyer këtë sezon në Champions, duke mposhtur më parë edhe Manchester City dhe Atletico Madrid, dhe kualifikimi i tyre në një të tetën e finales do të ishte një sukses historik.