Selektori i Kombëtares së Shqipërisë, Sylvinho, është i shqetësuar për repartin e sulmit para ndeshjes së rëndësishme ndaj Polonisë më 26 mars, pjesë e “play-offit” për Botërorin 2026. Dy futbollistë kryesorë, Armando Broja dhe Arbër Hoxha, janë në dyshim për shkak të lëndimeve që i kanë mbajtur jashtë fushës në ndeshjet e fundit me klubet e tyre. Broja nuk ka luajtur në pesë ndeshjet e fundit të Burnleyt, duke pasur probleme fizike që e kanë kufizuar paraqitjen e tij. Ndërsa Hoxha ka munguar në tri ndeshjet e fundit të Dinamo Zagrebit për shkak të një lëndimi në shpinë, duke luajtur vetëm 45 minuta në ndeshjen e fundit më 22 shkurt.