Kombëtarja e femrave e Kosovës, e njohur si “Dardanet”, ka nisur në mënyrë të shkëlqyer fushatën e kualifikimeve për Kampionatin Botëror 2027, duke mposhtur Gjibraltarin me rezultat të thellë 6-0 në stadiumin “Fadil Vokrri” në Prishtinë. Golat u hapën që në minutën e 4-t me Kaltrina Biqkajn, ndërsa Sara Sahiti dyfishoi epërsinë në minutën e 26-të, duke përfunduar pjesën e parë me rezultat 2-0. Në pjesën e dytë, Modesta Uka, kapitenia Erëleta Memeti dhe Gentiana Feraj (me dy gola) shënuan për të vulosur fitoren bindëse të ekipit të trajnerit Sami Sermaxhaj. Kosova bën pjesë në Grupin 2 të Ligës C, ku kundërshtari i radhës do të jetë Kroacia, e cila fitoi minimalisht ndaj Bullgarisë; fituesi i grupit kalon në ‘play-off’ dhe në Ligën B, ndërsa edhe vendi i dytë ka mundësi për ‘play-off’.