Klubi i futbollit Prishtina është dënuar nga Komisioni Disiplinor i Federatës së Futbollit të Kosovës për shkak të incidenteve që ndodhën pas përfundimit të ndeshjes kampionale kundër Dritës, e cila përfundoi me rezultat 1:1. Tifozët prishtinas, të njohur si "Plisat", kaluan rrethojat e stadiumit dhe u përpoqën të përleshen me tifozët mysafirë të Dritës, por ndërhyrja e Policisë së Kosovës shmangu përshkallëzimin e situatës. Për këtë shkak, Prishtina është dënuar me zhvillimin e dy ndeshjeve si vendas pa praninë e shikuesve dhe me një gjobë financiare prej 2,000 eurosh. Klubi ka afat 15 ditësh për të paguar gjobën, ndërsa dënimi vjen si pasojë e lëshimeve në organizimin e ndeshjes dhe shkeljeve të rregullores disiplinore.