Të mërkurën në orën 15:00 në Gjilan zhvillohet derbi i xhiros së 31-të të Superligës së Kosovës në futboll mes kampiones në fuqi Dritës dhe Prishtinës. Drita kryeson tabelën me 57 pikë, pesë më shumë se Ballkani në vendin e dytë, ndërsa Prishtina ka rënë në vendin e katërt me 45 pikë dhe rrezikon të mbetet jashtë garave evropiane në sezonin e ardhshëm. Përveç këtij takimi, po të mërkurën zhvillohen edhe ndeshjet Llapi – Prishtina e Re, ku dy skuadrat luftojnë për mbijetesë, dhe Malisheva – Gjilani, që është një duel për vendet që çojnë në Evropë. Të enjten do të zhvillohen ndeshjet Drenica – Ballkani dhe Ferizaj – Dukagjini, të cilat gjithashtu kanë rëndësi për renditjen finale në Superligë.