Boksierja kosovare Donjeta Sadiku do të përballet sot në orën 14:00 me brazilianen Santos Rebeca De Lima në finalen e turneut ndërkombëtar të boksit Strandja, që po mbahet në Sofje të Bullgarisë. Pas një rrugëtimi të suksesshëm ku mposhti bindshëm kundërshtaret e saj, përfshirë egjiptianen Ayyad Yomna në gjysmëfinale, Sadiku ka siguruar tashmë medaljen, por synimi i saj mbetet medalja e artë dhe mbrojtja e titullit të fituar vitin e kaluar. Turneu Strandja është një nga më të vjetrit dhe prestigjiozët në Evropë, duke mbledhur boksierët më të mirë nga e gjithë bota, dhe një fitore e mundshme do ta bëjë Sadikun kampione për të dytin vit radhazi. Me këtë duel, Donjeta synon të konfirmojë formën e saj të shkëlqyer dhe të ngrejë sërish flamurin e Kosovës në majat e boksit ndërkombëtar.