Kampionia e Kosovës në futsal, Drenica Futsal, ka nisur udhëtimin drejt Hungarisë për të marrë pjesë në garat preliminare të UEFA Futsal Champions League, duke përfaqësuar për herë të parë vendin në këtë kompeticion prestigjioz. Ekipi nga Skenderaj është pjesë e grupit D dhe do të luajë tri ndeshje në Budapest: të martën kundër Sakarya Karasu nga Turqia, të mërkurën me SS Murata nga San Marino dhe të premten me Ujpestin nga Hungaria. Para nisjes, klubi vizitoi Kompleksin Memorial “Adem Jashari” në Prekaz, ku nderoi heronjtë e lirisë së Kosovës, duke marrë forcë dhe frymëzim për sfidat që i presin. Drenica Futsal synon të përfaqësojë me dinjitet jo vetëm klubin dhe rajonin, por edhe gjithë Kosovën në arenën evropiane të futsalit.