Klubi i futbollit Drita nga Gjilani ka zyrtarizuar ndarjen nga kryetrajneri Zekirija Ramadani, pas më shumë se dy vjet e gjysmë bashkëpunimi të suksesshëm. Në një komunikatë për media, klubi shprehu mirënjohje të thellë për kontributin e trajnerit, duke theksuar se sukseset dhe titujt kampion të fituar gjatë kësaj periudhe do të mbeten pjesë e historisë së klubit. Drita vlerësoi gjithashtu arritjet në arenën ndërkombëtare si dëshmi të punës kolosale të bërë së bashku me Ramadani. Në fund, klubi la të hapur mundësinë e një ribashkimi në të ardhmen dhe i uroi trajnerit suksese e fat në rrugët e tij të reja.