Klubi francez Paris Saint-Germain, kampioni aktual i UEFA Champions League, ka ftuar dy futbollistët e FC Prishtinës, Lorik Mehmetin dhe Rin Ahmetin, për të marrë pjesë në një periudhë stërvitore vlerësimi në Akademinë e PSG-së. Kjo periudhë do të zhvillohet nga 27 korriku deri më 9 gusht 2026 në kampusin e PSG-së në Poissy, Francë. Ftesa përbën një njohje të rëndësishme për cilësinë dhe potencialin e dy lojtarëve, si dhe është rezultat i bashkëpunimit profesional mes FC Prishtinës dhe klubeve evropiane të njohura. FC Prishtina thekson se kjo është një dëshmi e riorganizimit të akademisë së të rinjve dhe një hap i rëndësishëm drejt promovimit të futbollistëve kosovarë në arenën ndërkombëtare.