Egnatia do të luajë nesër në Rrogozhinë ndeshjen e parë të gjysmëfinales së Kupës së Shqipërisë kundër Elbasanit, një sfidë shumë e rëndësishme për ecurinë në këtë kompeticion. Skuadra nga Rrogozhina synon fitoren që në takimin e parë për të mos e lënë gjithçka në ndeshjen e kthimit në Elbasan, edhe pse gjatë këtij sezoni nuk ka arritur të mposhtë Elbasanin në kampionat. Pas fitores së pastër 3-0 ndaj Bylisit në Superiore, Egnatia ka rikthyer moralin dhe besimin, duke u paraqitur me optimizëm për këtë përballje të vështirë. Elbasani, që ndodhet në vendin e tretë dhe është pjesë e “Final Four” në kampionat, paraqitet si një kundërshtar i fortë dhe enigmatik, ndaj Egnatia duhet të gjejë formulën perfekte për ta eliminuar dhe për të synuar finalen e katërt në Kupë.